如今的 Novel Fergus 是香港 hip hop 音樂炙手可熱的名字，YouTube 上的歌曲 MV 動輒數十萬甚至過百萬 views。標誌性的一米八高瘦身型，總是包紮頭巾，只此一家的低吟唱腔，配上公認的「靚詞」，無論草根地踎的〈深水埗〉、〈黑水鬼〉，到江湖恩怨、中外神話，在他筆下總透着點古風和詩意。
回帶不過六、七年前，他日頭在地盤做燒焊、晚上在 cafe 上班，一心只想儲錢，「由細阿媽就教，搵十蚊就儲九蚊，呢套野係打到超實。」但銀行有存款，他發現人並不開心，有日一個做 cafe 的同事叫 Novel Friday，也玩 hip hop，聽見他每日打兩份工，第一個反應是「oh shit …真係慘喇。」
那一刻他突然醒覺，找不到工作和生活的意義，有日在地盤看見一個老師傅眾目睽睽下被罵得狗血淋頭，轉身就笑嘻嘻繼續開工，他害怕，眼前的畫面就是自己的將來。他不想這樣，把心一橫，開始去學紋身。
「跟住就閪冧啦」，他笑得豁達。學紋身、做音樂，幾乎一度花光積蓄，把過去要拼命儲錢的觀念完全顛覆，「做紋身的時候又冇客啦，又要交學費，又要起居飲食，仲要自己咁得戚走去寫歌𠻹，卒之就咩都冇喇，但係又死唔去喎，仲幾開心𠻹。」
開始做音樂之後，他得到 Novel Fergus 這名字，說來其實頗 random， ‘Novel’ 是朋友 Friday 提議的， ‘Fergus’ 是一個紋身的客人幫忙想，他一聽，「哇，掂呀」，湊在一起，至少聽起來很型。
‘Novel’ 意即新的、與眾不同的，這個身分，對他也意味一種新生，「以前唔太搵到自己的價值，搵唔到存在感，但做音樂搵得到。」
（編按：閪冧，廣東話粗口，形容極度混亂或嚴峻狀況。本文意在貼近受訪者背景和個性特質。若有讀者對標題內含粗口感不適，我們無意冒犯，希望你讀畢全文後，會對看似粗鄙的事物有不同觀感。）
從江湖到鬼故
Fergus 以前在地鐵站跳街舞，認識了後來的製作人 DaiShin，一齊成立的獨立音樂廠牌 Yack Studio，前年才舉行發布會，去年在九展辦過專場演出，最近已由新蒲崗一個不足二百呎的工廈單位，搬到同區二千多呎的新 studio。
今年 29 歲、身型高大的 Novel Fergus 一貫包著頭巾，身穿黑背心，露出充滿紋身的手臂，正在臨時設置的攝影棚前，擺出各個型 chok 姿勢，為下月自己的首個個人演唱會《盂蘭勝會》宣傳，對緊湊的日程似乎吃不消，甫見面即忍不住擺手，示意讓他先坐在沙發上「回一回氣」再繼續。
繼前年的專輯《梟》建立了一個江湖世界，描繪出猶如杜琪峯《黑社會》系列的地下眾生相，「慢功出細貨要你久等」的 Fergus，上月開始發布新系列以「鬼故事」為主題的新歌：講述身無分文的男人愛上千金小姐的〈胭脂扣〉、道士想收服鬼王卻被蠱惑的〈佛道說〉。
乍看是開展新的章節，細聽又會發現，新歌靈感取材自港產片如《殭屍先生》、《鬼打鬼》、《倩女幽魂》等，都是八九十年代，陪伴一代香港人的電影。Fergus 也說，港產片是他的創作其中不可或缺的元素，「因為我睇港產片大嘅」。
不止是港產片，還要是周星馳、古惑仔一類的舊片，「因為⋯⋯我對迪士尼嗰啲就無興趣嘅，」他有點不好意思笑笑，嘗試解釋，「即係，外國啲呀或者女仔啲呀，個種呢（唔得）。我個 vibe 係陀地啲囉，有啲人可能中式嘢係唔中佢㗎嘛，例如鍾意睇《廿二世紀殺人網絡》，反而我的取向係港式啲，可能因為深水埗長大。」
深水埗的人情和殘酷
深水埗，外人眼中充斥無家者、治安和衛生問題的社區，忍不住問，在深水埗長大是一種怎樣的經驗？「又可以話好有人情味，又可以話冇咩人性咁樣囉。」想了幾秒，Fergus 得出一個有點矛盾的答案。
Fergus 升讀小學時，因家人派到公屋，由港島搬到深水埗。街上經常見到的人，由鬼佬變道友，他記得小時候媽媽很緊張，會叮囑他不要走近多針筒的草叢。除此之外就是街坊街里的人情味，可以隨時走去隔離屋「吹兩嘴」，「講我哋嘅笑話，唱嗰啲咸濕歌，笑點都是很市井，屎尿屁之類。同埋會有一種，窮的地方會開的玩笑，會覺得一啲高級嘅嘢係好『扮嘢』。」
Fergus 喜愛蒲街頭，經常遊走天光墟觀察別人執到寶的興奮，也喜歡到鴨寮街看有甚麼二三四手的新奇玩意。那時候家中會播梅艷芳、譚詠麟，出街會聽到粵曲，見到道士、喃嘸佬，返學路上經過公園，總有十幾廿個呀叔在拉二胡、吹嗩吶。
還有隨處可見的翻版碟，大多都是舊港產片，耳濡目染之下，他的口味也變得很「地」很「港式」。一開始看電影其實只是為送飯，「即係個外賣到咗，冇嘢睇我係食唔到飯嘅。」多虧 Foxy（千禧年代常用的檔案分享網絡平台）的出現，他看了很多港產系列電影，因為「抵」睇，「可能發掘咗一個系列，例如《古惑仔》第一集，咁打後個幾月就唔駛搵，就會瘋狂搵啲唔同系列，跟住就追。」
同時，深水埗殘酷和冷漠的一面也是實在的，「即係你隔離死人冧樓，都係『唓』，即係『大家都係躝癱嚟㗎啦，好出奇咩』嗰種。」返學見到道友打橫躺在路上，大家也是若無其事跨過，還學會和毒 L、飛仔、古惑仔、MK 仔都「傾到偈」，但又不深交的處世本領。
原來快樂可無關金錢
在深水埗生存，錢是另一道保命符，Fergus 投身社會後做過很多工作，7 仔、廚房、 地盤⋯⋯拼了命地要儲錢，卻沒想過工作的意義，「因為喺嗰個世界，你就係同隔離比，即係『我仲有啲積蓄，隔離餐飲餐食餐餐清』，我哋就係優勝咗，係呢個方式。儲錢係好事，『你一定要安全，要學一個技能保命，就算呢度失業，你都要搵到嘢做』，呢種觀念打咗喺個腦度，打到好死。」
最「走火入魔」的時候，Fergus 日頭返地盤，一放工就即趕往咖啡店開工，「嗰時我死都唔去旅行，啲 friend 摟我，貴嘅唔去玩。去到一個位係，今個鐘頭冇去返 cafe 嘅話，收工呢一段時間我就係蝕咗。嗰時我都覺得，自己有點怪怪哋。」
銀行存款開始有十萬、二十萬，但 Fergus 一點也不快樂，望着那些數字，卻感受不到自己擁有甚麼，「即係十萬廿萬做到啲咩呢？反而好驚、好繃緊。」Fergus 把心一橫，轉型去學紋身，由「守財奴」變成「月光族」，竟發現過得很開心。
他很記得，初初成為紋身學徒，有日放工走路回家，通往屋邨的路上，他突然快樂得差點哭出來，「出嚟做咗咁多年嘢，事事總有個『開工 mode』。但我而家返嘅工係我鍾意做㗎喎，我返去畫畫咋喎，由踏入紋身舖，到走嗰刻，都係開心㗎喎。」
「撚字」達人之煉成
Fergus 以前沒想過自己會玩 hip hop 做歌，讀書時雖然會聽 MP4、LMF，MC Lorry〈乜嘢係戀愛〉也是唱 K 必點，就只是覺得機關槍式唸唱很型，後來開始跳街舞，接觸節奏強勁的 hip hop，也只是為了跳舞「聽 beat」。
不過後來回想，有個畫面一直留在他腦海。中一中二的時候，有個街舞朋友神秘兮兮地說「搵到啲正嘢」，帶他到旺角，當時有場街 show battle，兩個人一支咪輪流 rap 30 秒，中間有個 beatboxer 那種。當其中一方還在 rap「你件衫真係好樣衰」之類，另一方說的卻是「睇住我寶刀未老／你就自掘墳墓」，Fergus「嘩」了一聲。眼前 rapper 就是 Heyo，「我覺得超正，嗰時最主角光環就係 Heyo，覺得他型、屈機，真係秒殺咗對面。」
自此在他心目中，「靚詞」的標準就有了一個高度。進入紋身圈子後，Fergus 認識了一班喜歡街頭文化的朋友，閒時跟他們到將軍澳 Cypher（圍圈說唱），去了幾次，發現自己都有話想說，卻不太適應那裡的模式，「你知 Cypher 就係大家鬥講嘢，播隻 beat 講到幾多得幾多，或者 battle 鬥串。」
玩了一段時間，他覺得那種「互鬥 diss 」的模式不太適合自己，隱約覺得「我好似係啱做作品多一點，就返屋企做自己嘅歌。」摸索的過程發現，hip hop 本身是黑人文化，外國 artist 那種滿身金鍊、講女講毒品的內容也不能搬字過紙，加上他骨子裡就是在深水埗「浸」大的地踎仔，喜歡中文、喜歡「港式嘢」，漸漸也就做出自成一派的作品。
以前睇 Heyo 的記憶浮上來，做出來的東西自然也會「撚字」，把歌曲當成藝術品去雕琢，「英文得好少字，但是講出來可以有好多 feel，即係 ‘so blue’ 咁樣，我們翻譯可以憂傷又得，點樣又得。 中文真的要靠形容，用哪兩隻字去形容，整個觀感就跟着那兩隻字變，所以中文會諗多好多，紅是鮮紅？豔紅？關個作者事多好多。」
做音樂找到自己價值
很多人以為，能寫出文縐縐歌詞的 Fergus 一定飽讀詩書，實情是他只有小時候愛看金庸，創作時偶看些「心靈雞湯」類的書作參考，一般「資料搜集」的過程都是上網找，例如想到某個字，然後 serach 「同義詞」，再慢慢拆開研究。
他冷不防又補充，「最近都會扮下嘢買下（書），即係都進修下」，例如甚麼書？「買返啲，《唐詩三百首》，本身都覺得好低 B，但買咗返嚟之後揭一揭，發覺係佢老套，要七個字七個字，但將入面某啲字拆出嚟係好好用，兼且係平時唔會見到。」
2019 年，Fergus 推出第一首作品〈老神仙〉，有網民留言「未聽過咁有特色嘅 rap song」，稱他為「說唱詩人」，自此奠定了意境和文學兼備的說唱風格。但真正讓 Fergus 慶幸自己開始做音樂，是 2021 年專輯《人之初》，那時他寫了〈黑水鬼〉，「之前的〈至尊寶〉、〈老神仙〉都係故事嚟，唔係自己嘢，〈黑水鬼〉就真的講到自己想講嘅嘢。」
在音樂上走出自己的路，同時做出成績，他至此終於找到自己的價值，「（以前）屋企又唔係我話事，間房又我哥話事，佢鐘意就橫邊錘；落到球場又唔係最惡嗰個，同班古惑仔玩，你又唔係撈得最掂嗰個；做廚房又唔係主廚；做地盤又唔係師傅，你有咩價值呀？唔係好搵到自己的存在感，但做音樂搵到。」
出《人之初》那時，他曾發文形容自己過去自卑，拖延，負面，內向，是做音樂帶來了改變，「可能是因為，可以抒發。細個比較負面、畀人恰，或者好壓抑，都會想有個英雄來救你，就像我小時候鍾意超人迪加，可能因為想有一個英雄來救你、關心你，或者你變做英雄，但正常生活係唔會有；但做咗音樂之後，我可以創造到好多嘢出來，我啲歌輸出去可以氹到人，好多人聽我啲歌又可以氹到我。」
而我啲歌一直派／命我自己改
運／一直眷顧／唔中個瓣唔開
俾支Mic我玩一晚／我玩到聲沙
啤酒樽轉中我揀／冒險同時講真話
- 〈黑水鬼〉
文／Nicole、丁喬
攝／Nasha Chan
Makeup: JOVY CHAI @jovyeechai
