近年香港不少小演員參演的電影、劇集演出，都令觀眾留下深刻印象 — 像《年少日記》鄭氏兄弟、《爸爸》阮氏兄妹、《看我今天怎麼說》的「手語孖寶」……戲裡演出自然生動，使人看得投入；戲外受訪回復稚氣，有時又讓大人們忍俊不禁。
看小演員幕前演出，觀眾難免好奇：尚未成年、甚至仍是「小學雞」的他們，真的享受演戲嗎？作為香港小朋友，他們的日常生活怎樣過？對未來有什麼想像？帶著寫有一堆認真問題的記事簿，記者走進香港兒童音樂劇團排練室，準備訪問幾位演出過電影、電視的小朋友。
一推門，只見演過 ViuTV 劇集《麻甩媽咪》的黃樂茵，正跟曾客串 Jer《大人之後》MV 的鍾凱晴在房間扔豆袋，笑聲不斷；未幾，《看我今天怎麼說》「小 Alan」 黃暐恆，及《麻甩媽咪》「李志榮」鄭忻諾抵達，兩個男孩年紀相若，一時在訪問現場跑跳追逐，一時在地上扭作一團，一時還唱起音樂劇的歌：「好想去玩，但習作未完成～」場面相當歡樂，及混亂。
擾攘一輪，四人終於在鏡頭前坐下，分成兩組受訪。跟我們平時訪問的大人很不同，小朋友們的對答較簡單（問為何演出，「好玩」），表達方式相當新潮（「我拍過 0 個嘢」），思維好跳脫（「佢去茶果嶺公園，因為鍾意茶果」），說話有時甚至老實不客氣，直擊要害（「我覺得你［記者］好無聊囉！」）
作為年齡比受訪者大幾倍的大人，記者深受衝擊，只得擱下記事簿，好好聽他們怎麼說。
點解演音樂劇？
四個小演員來自香港兒童音樂劇團，正為 8 月公演的周年演出《小高的遊樂場》作排練。《小高的遊樂場》原為作家林建才的繪本，經劇團改編，由合共 116 個介乎 4 至 15 歲的小朋友分成兩組，演繹主角「小高」與同學在太平山頂考察途中意外迷路的冒險故事。
四人演出原因各有不同，像黃樂茵與鄭忻諾，三歲時已入團，經驗豐富。10 歲的樂茵在電視劇演過女班長角色，真人確有幾分班長風範，擅於表達。
記：點解你會嚟劇團？
茵：一開始我阿媽見到我咩都唔識，又唔識做運動，唔似佢咁多才多藝，就諗住拉我去試音樂劇，因為見到好似好 chill，又冇功課……原本我都無諗過會咁鍾意，但學下學下就變咗好鍾意。
9 歲的忻諾起初參加時正值疫情，「我阿媽阿爸唔想我變到唔講嘢，就嚟呢度上 iPad 個視像（課堂）玩囉！」怎料才玩了幾個月，導師已向他父母反映：「你個仔超多嘢講。」訪問當日，他時而扮豬叫，時而反白眼，更多時候在房間跑來跑去，沒半秒停下。
另外兩個小朋友今次是首度演出音樂劇，父母為聾人、曾演出《看我今天怎麼說》的黃暐恆說，之前有人從電影看到自己演出，介紹他來這劇團。
黃：我企咗喺度大半日，考慮咗好耐，應該參加好定唔參加好呢？
記：你考慮啲咩呢？
黃：（少有地正經）我唔鍾意舞台劇，但諗下諗下呢，又諗唔啱喎，跟住呢，我又喺網上睇到啲廣告啦，見到啲人好似玩得好開心，咁我就想試吓去遴選。
受訪者中最年幼的是 7 歲的鍾凱晴，問為何參加，她說自己一早看過這齣音樂劇的繪本原著，以至同一作者創作的其他繪本。
晴：（細細聲）我媽見到（劇團招募）就話，『呢個係佢嘅書翻譯嘅戲，不如報名啦！」然後就㩒㩒㩒，報咗名囉嘻嘻嘻…
《小高的遊樂場》角色眾多，有人演的是動植物，如鍾凱晴會扮「短吻果蝠」，黃樂茵演鹿科動物「赤麂」，也有的演人類，如黃暐恆角色是博物學家「博博士」，鄭忻諾演的是主角「小高」。
能夠擔任主角，大人大概會滿足，但細路有細路的哲學。樂茵和凱晴說不太想演大角色，「怕辛苦呀」；鄭忻諾就直言真的很矛盾。
鄭：（苦惱樣）我又想做主角，但又唔想背咁多台詞，所以一直問個導師，究竟如果我做主角的話，可唔可以幫我減少啲台詞呢？原來最後係唔得㗎！（一秒 high 返）
表演好玩嗎？
這些小朋友平日究竟玩什麼、做什麼？
黃暐恆最喜歡彈結他、踩滑板；鄭忻諾鍾意籃球、排球、看書；鍾凱晴喜歡看漫畫、畫畫，有時也打籃球；黃樂茵給出的答案最特別：「最鍾意瞓覺，因為我懶到出汁（偷笑），我平時成日遲瞓，所以通常都會好攰囉。」
記者好奇追問，暑假日子很有限，既然「好想去玩」，怎麼不用盡每分每秒打波、睇書、瞓覺，而要參加音樂劇？對於他們來說，表演和排練是一種「玩」嗎？黃樂茵答案最肯定：
茵：梗係玩啦！
記：咁你覺得好玩在什麼方面?
茵：其實我都唔知道……我只知道如果我參加咗，我就會笑，我笑我就會開心，但我又諗返，其實點解我笑呢? 可能因為我是個笑點很低的人…
因為喜歡演戲，她立下志願。樂茵之前拍過 TVB 《金式森林》和 ViuTV《麻甩媽咪》，見識過不少大人演戲後，默默希望他日成為演員：
茵：我諗住做演員嘅，就係電視劇嗰啲…不單止可以認識好多人，仲可以真正 show 晒畀所有人睇，你自己演出係點樣。雖然唔係展示真正的自己 — 因為叫做演戲嘛 — 但我覺得其實好有意義。
黃暐恆和鄭忻諾同樣有電影、電視的演出經驗，作品播出後，兩人各自都獲不少觀眾讚賞。但當記者問是否喜歡演戲，也許因為互相「傳染」，兩個男孩同聲說不。
鄭：因為要背台詞！
黃：我——為咗——舞台劇——錯失咗好多玩嘅機會，導演啊你畀少啲台詞我啦！
茵：（像班長般突入）個角色你㗎喎，你唔好參加咪得囉
記：咁你哋鍾唔鍾意表演㗎？
鄭：好憎啊，我覺得而家同佢有仇～
茵：（質疑）咁憎你又喺度。
鄭：最憎背台詞，無嘢好講。
黃：電影鍾意囉，舞台劇唔鍾意，背台詞，要一 take 過。
後來鄭忻諾再補充，自己其實有想過將來做表演者，只是「不想做舞台劇」，而之前拍電視劇的經歷也不特別喜歡，他真正想做的，是「唱歌加跳舞」：
記：你鍾意唱歌跳舞嘅？鍾意唱咩歌？
茵：佢（鄭）唱〈紅日〉㗎！
鄭：流行曲囉，〈紅日〉、〈黑玻璃〉、〈凡星〉。或者古典歌。
記：咁你鍾意咩明星？
鄭：MIRROR 囉。
記：有無一個明星／歌手係你想成為嘅？
鄭：我唔會有呢一個諗法，因為四十年後我係會拋棄唱歌之路，我到時一定係會想去做老師㗎，因為我暫時數學考試係 high level。
經常在鏡頭前跟鄭忻諾鬥嘴的黃暐恆，雖然口裡投訴背台詞很麻煩，但其實心底也想成為演員。原因無它，《看我今天怎麼說》的演出及事後迴響，讓他窺見一個美好的新世界：
記： 你會係想做表演嘅人？
黃：我想做演員，我話電影嗰啲，因為我去過好多場謝票場，都覺得好榮耀。
記：好享受？
黃：我鍾意社交，我真係好感恩我拍到電影，我喺金像獎見到超多明星，第一次接觸咁多明星，我喺後台見到古天樂啊（沾沾自喜）！
鄭：（難以置信）咁有無搵佢簽名啊咁我想問？
黃：唔係喎，但佢見到我佢乜都冇講，淨係對住我咁樣（扮古天樂微笑、輕輕揮手）。
我們再問這位「小 Alan」，心目中有沒有想成為哪位明星，他想了一會，答沒有，但就不停向《看我》男主角游學修表白 —
記：你鍾意邊個？
黃：我鍾意「試當真」。
記：有冇邊個演員令你覺得，做到佢就好喇？
黃：無呢個諗法，但係我真係好鍾意游學修，佢試過接我放學，揸車送我返屋企，佢對我好好～
學業壓力下好想去玩
近年香港學童自殺率高企，兒童音樂劇團總監呂妙敏於其他訪問曾言，為孩子承受的壓力感痛心，經常在想怎樣才能讓他們感受到，即使遇著挫敗仍有路可走？於是這兩年音樂劇都圍繞類似主題：怎樣面對悲傷、失敗？如何重拾「玩」的樂趣？
受訪的小演員都是小學生，問起學業生活，四人反應相當一致：其實不是不喜歡上學，只是討厭功課、考試、補習。
茵：（認真思考 mode）如果撇除要溫書考試那些，其實返學我係鍾意嘅，但因為而家返學一定要包含溫書考試功課，所以我唔肯定嗰個叫唔叫鍾意囉。
黃：（一輪嘴、大聲）讀書，唔鍾意；返學，好鍾意！讀書，有壓力；返學，無壓力！上堂，有壓力；小息，無壓力！喺學校，無壓力；喺屋企做功課，有壓力！上學，有壓力；放學，無壓力！
小朋友有壓力，如何抒發？音樂劇提供了一扇窗，讓他們唞唞氣，劇中有首歌叫《好想去玩》，伍卓賢作曲，張楚翹填詞，說的是小孩的心事：
好想去玩 但習作未完成
好想去玩 疲累沒法適應
上課下課 學琴後再補習
老師老師 練習太多 怎麼能停
訪問期間，一說起這首歌，小演員個個雀躍到不得了，爭著要唱。記者問他們為何喜歡，黃暐恆、鄭忻諾搶著回答：
記：你哋都鍾意《好想去玩》呢首歌？
黃、鄭：好鍾意啊！
黃：畀我講先畀我講先！
鄭：可以表達到小朋友我哋而家嘅情緒，因為每一日我哋都要做功課然後先可以玩。
黃：要表達小朋友嘅心聲呢個係啱㗎～
鄭：百分之百正確啊！
黃：因為我好憎功課啊，好～想～去～玩～
鄭：我都！好憎！功課！但係我真係好想去玩㗎。
記：邊句歌詞特別有 feel?
黃：好多謝作曲（按：作詞）嗰個！（兩人不知何解在笑）佢畀咗啲小朋友嘅心聲我哋，上課下課學琴後再補習，「老師老師！你嘅練習停未啊？」好鍾意呢句！
鄭：（大聲）我就最鍾意第一句囉，因為我真係「好想去玩」㗎，但係！我永遠啲習作係唔可能完成㗎，我而家個書包入面仲有兩本 project 要做啊，我都好想問老師究竟你啲功課幾時出停㗎？
四個小演員都有為〈好想去玩〉錄音，其中一位家長事後問劇團職員：「做咩要整一首咁嘅歌呢？點解唔整一首『我好鍾意返學啊／做功課好好玩』，咁咪可以教好佢哋囉？」小演員們瞇著眼向記者反問：「唔好咩？呢啲歌…你哋覺得唔好啫，我哋覺得好好啊。」
他們都很期待，正式演出時，站在台上唱這歌的畫面。
「好正，下面好多觀眾都係阿爸阿媽，嗰下唱出嚟就真係同阿爸阿媽講，唔好再畀咁多壓力我哋啊～」樂茵說。
後記
訪問小朋友難不難？視乎抱什麼期望而來。
假如你期望他們如大人般，端正坐好，完整有禮地道出對萬事萬物的看法，當然不可能，你注定失望、浮躁；但假如在過程中，能嘗試在他們的角度一起笑，一起玩，孩子們給出的反應，有時更加真實，更加寶貴，甚至令人滿載而歸。
問題是，作為大人，我們會否記得，在某些時候擱下重擔，放開懷抱，好好去玩？
像那首小演員最愛唱的〈好想去玩〉，乍看像是孩童心聲，但歌詞有些段落，其實也是給大人的提醒：
只想放鬆 重拾一切樂趣
看美夢裡 樂園亦變廢墟
怕已沒法放任 如同十歲
當初理想 仍舊收於我心裡
…
沒法子 沒法子 改變現時
忙做嘢 忙學嘢 仲有考試
但每天 其實已沒有新意
再問我 我亦會說一次 好想去玩
小朋友已經表達了，大人們，今天你又怎麼說？
文／阿果
攝／Avril Cheng
影片／林君睿
《小高的遊樂場》繪本音樂劇
地點：中環愛丁堡廣場5號香港大會堂劇院
日期：8月8日晚上8:00；8月9日上午11:30、下午3:30、晚上8:00；8月10日下午3:30、晚上7:30
票價：500元、340元、204元*
*全日制學生、60歲或以上高齡人士、殘疾人士及看護人、綜合社會保障授助受惠人士可獲六折優惠。
