由 2019 年 5 月首演，經數度 re-run 的音樂劇場《回憶的香港》，將在今年 9 月 9、10 日首次到英國倫敦演出。風車草劇團昨（1 日）宣佈消息，大批移英港人在帖文下留言「多謝！」「終於等到！」
風車草其中一名創辦人梁祖堯同晚在 Instagram 直播，有觀眾問到海外公演與香港公演的分別，梁祖堯表示分別不大，隨後又有感而發：「但係 … 琴晚我喺度幻想，喺個腦裡面 run 咗一次《回憶的香港》，去到最後幻想係英國嘅劇場，嗰班係離開咗香港去英國嘅觀眾，然後我哋講一個香港嘅故事。然之後我就 … 我就開始喊。」
梁祖堯今日向《Wave.》解釋令他如此觸動的原因，是近年眼見很多朋友離開香港，而英國正正是其中一個熱門地點，「我同佢哋都好耐冇見，好掛住佢哋。當我諗到我哋將會喺一個新嘅地方見面，嗰種感受好湧動。」
隨後他引述《回憶的香港》最後一段對白，大意是這樣的 —
「無論將來發生啲咩，我哋都要記住我哋嘅家、記住我哋嘅根、我哋嘅種子、我哋嘅歷史，記住我哋係邊一度嘅人，記住我哋嚟自邊度。」
他說，想像在英國的劇場上讀出這段對白，「我覺得對住離鄉別井嘅觀眾講呢番說話，個感覺最震撼。」同時，他亦希望透過這齣劇，告訴移英的香港人，「我哋冇忘記到你哋，我哋幾時都係一家人，我哋幾時都有連繫。」
梁祖堯提到，公佈英國演出的消息時，最令他印象深刻的留言是，「睇咗風車草十幾年，以為以後都冇機會再睇 … 好開心好感動。」事實上，將舞台劇帶去英國的念頭實現，過程並不簡單，在完全沒有贊助的情況下，場租加上製作費接近七位數；佈景需事先在香港製作，再運往英國，表演完畢後亦要運回香港棄置，所有費用皆由劇團自行承擔。
在英國尋找合適場地亦非易事，「唔可以太貴，又唔可以太偏遠。」近倫敦市中心的場租偏貴，但場地太偏遠亦會增加觀眾的時間成本，最後敲定倫敦 West End 鄰近大英博物館的 Peacock Theatre 作三場演出。
音樂劇場《回憶的香港》由梁祖堯、湯駿業、邵美君及彭秀慧主演，自2019年首演至今已三度公演。創作團隊花近兩年時間，走訪香港十八區，透過資料搜集、人物訪談及導賞工作坊等，收集自開埠以來的香港文化、人情味故事和城市趣聞，以多媒體互動的形式，向觀眾提問，「你記得 … 嗎？」「你有冇睇過…」「你有冇做過…」「你知道 … 嗎？」
劇目即將飄洋過海之際，梁祖堯也想鼓勵留在香港的人，「好坦白講，我覺得大家做好自己啦，同埋個心裡面保持善良，繼續相信愛。我唔覺得係阿 Q 呀咁樣，我覺得咁樣係啱。」
