2021 年 12 月，陳柏宇在紅館演唱會唱〈逸後〉，螢幕播出機場離別和人們擁抱的畫面，並寫上 1997 及 2021 的年份，他一度哽咽，唱不下去。一年半後，他抵達英國舉行一連兩場 The Fight Goes On World Tour 演唱會，首場昨晚（1 日）在英國曼徹斯特 Manchester Club Academy 舉行。
因為當地大學正值考試時期，團隊尋找演出場地比較困難，原定場館 Manchester Academy 3 可容納約 400 人，因賣飛反應熱烈，最後改用 Manchester Club Academy，可容納 700 人企位。陳柏宇與團隊先到 London 綵排練習三日，再到 Manchester 演出。現場所見，觀眾大部份是香港人，亦有不少內地歌迷。有觀眾由蘇格蘭愛丁堡特地南下睇騷，亦有人來自香港，旅行探親時順道欣賞。
談及移民潮，陳柏宇在台上表示，離鄉別井幾時都是很困難的事，若有朋友到英國未能適應、不開心失落的話，「千祈唔好氣餒，呢段唔開心、孤單日子會過，當喺度耐啲嘅時候，開始識多咗朋友，習慣呢度生活，失落感覺會慢慢消失，然後就會搵到生活喺度嘅樂趣，所以希望大家喺度嘅生活過得開心。」
演唱會上，陳柏宇除了唱出〈對得起自己〉、〈你瞞我瞞〉、〈命盡頭〉、〈有我〉及即將派台的新歌〈令人期待的下期預告〉外，還講了不少「經」。例如在唱〈有天〉前，他認真地說，「希望我感受到你哋畀到我的愛，其實我唔需要你哋畀愛我，需要你哋感受到歌曲裡面想表達的內容、人生哲學」，觀眾紛紛裝作不耐煩回應：「算啦唱歌啦！得架喇！收到！OKOK！」
「陳伯講經時間」當然未有因此中斷。他續叮囑台下歌迷：「你要記住歌手、偶像就只係你哋喜歡的幕前的人（形象），如果你要真正了解嗰個人，其實要透過溝通，同埋唔關佢所表達的內容裡面，去睇佢為人係點，你明唔明白我想講咩？」觀眾大笑，陳繼續解釋：「如果我話畀你聽，『我嗰日拖阿婆過馬路，我好鍾意拖阿婆過馬路』…其實係冇用嘅，你要聽我講完全唔關事嘅嘢，聽下我個人對其他人係點，睇下佢點樣 treat 人，先至決定佢係咩人。」歌迷大叫：「OK！」
陳伯總結：「千祈唔係畀佢幕前吸引到，（指著自己）嘩靚仔你梗係鍾意架？係咪先？（觀眾：所以我好鍾意你！）但可能我暗啞底打小朋友、呃阿婆啲錢，你唔知架！係咪先？但我無。」講經時間暫告一段落，觀眾無不大笑。
完騷後陳柏宇與當地歌迷合照，並送上擁抱。The Fight Goes On World Tour 演唱會倫敦站將於本周六晚舉行。
攝／Joey Kwok
