睽違兩年，ERROR 昨晚於會展 Hall 5BC 舉行一場《WHAT’S GOING WRONG??》演唱會，不少歌迷舉起「我們就是喜歡錯」的手幅出席。
ERROR 四子先以〈無敵聖衣〉、〈野舞士〉、〈殺死我的經理人〉開場，然後在舞台上自辦頒獎典禮，自嘲出道六年後人氣下滑，由上次演唱會於九展開四場，變成今次在會展開一場；由 MakerVille 二隊變成第三甚至第六梯隊（被 COLLAR 及 MIRROR 三分隊追過），甚至一直無緣在頒獎禮獲獎，從而點出演唱會主題 — ERROR 這兩年做錯了什麼事，what’s going wrong?
其後四子各有個人環節，打頭陣的 193 負責講「黑暗嘢」，提起各團員的黑歷史，笑自己的法拉利炒車，笑保錡在節目上的「不雅言論」、跟最受歡迎女歌手買紙巾，笑肥仔生意失敗，笑阿 Dee「樣衰」、「IQ 低」…… 193 笑言，負面新聞既令 ERROR 受 Haters 關注，也「守護」了網絡流量，但他們亦不時反思應否轉型，「仆少啲街」、「少啲亂講嘢」、「行啱嘅路」，卻陷於兩難之中：
「原來想行啱，就會冇咗初心。ERROR 六年前一出道個名已話畀你知，ERROR 嘛，錯嘛，如果我哋行啱咗，咪即係冇咗初心？正常人嚟講，食辣食屎食蟲，係咪錯？但對我哋嚟講，係啱，大家鍾意睇嘛。正常做藝人，要識唱歌跳舞靚仔才對，但對我哋嚟講，咁係咪錯呢？究竟 ERROR 要做錯定做啱先氹到大家？ERROR 唔再錯，就好似臭豆腐唔臭，冇咗噱頭。」
193 提起，月初叱咤聽見 Dear Jane bass 手 Jackal 在台上說，於樂壇服務了二十年，他反思其實 ERROR 不過出道六年，「憑乜嘢喺度阿趦阿趄、搖擺不定，我哋今日選擇行呢條路，可能呢一刻會少咗掌聲，但我哋鬥長命啦，我諗只要一步一步堅持行落去，keep walking，總會去到想去的地方，會四個人一齊上台攞獎。」
之後輪到肥仔，一連用最擅長的跳唱，表演〈約齊靈魂在填墓開生日派對〉、〈Lady Killa〉、〈Mascort〉三首快歌；去年多次被負面新聞纏身的保錡，在個人環節以小丑妝登場，先唱〈跑吧小丑〉，到唱〈笑一個〉前則欲言又止：「有好多嘢喺人生唔需要講，但講出嚟或者…（沉默，嘆氣）…唱首歌畀大家聽。」表演時，他身後的大屏幕，則投影大量負面報道、刻薄留言。最後他與肥仔合唱陳蕾的〈凡星〉時相擁，顯得有點感觸。
Dee gor 則作棟篤笑表演，由日本漫畫提及的 2025 年世界末日，談到熊貓安安可可改名風波，「有個熊貓活動，改名比賽活動，搞咗一輪，最後用返原名，其實呢個賽果好代表到香港喎……我哋香港人的確需要 encore（安可）喎，我就好想 encore 返電影的黃金時期大量製作，但其實講到尾兩隻字包晒：我哋最想 encore 返繁榮。」
世界那麼多衝突，繁榮難以 encore，香港平民怎麼辦？阿 Dee 以半開玩笑方式聊到除夕觀塘海濱 free kiss、free hug 的 Gen Z，「佢哋成晚都係幫襯一間士多小店，係本土嘅，你哋班大人去咗邊呀？北上消費呀？」
「呢班年輕人教識我一個道理，快樂可以係免費，口渴去士多消費，by the way，ViuTV 都係免費嘅。」最後送上一段 freestyle 舞蹈表演：「留低嘅，2025 年祝大家 搵到免費嘅快樂，有可以消費嘅士多，唔怕世界末日，香港可以 encore。」
演唱會尾聲，ERROR 化身陳百祥、曾志偉、譚詠麟、劉德華，連唱〈獨自去偷歡〉、〈我至叻〉、〈天下無敵我愛你 X 畀獎金〉、〈愛情陷阱〉Medley，事後受訪被問及為何選擇有此演出時，肥仔答：「呢啲全部都係我哋細細個聽的歌，聽完會好 high，我哋係玩緊個經典，有人或會誤會我哋係咪取笑佢哋，而係想好開心地玩。」除此以外，ERROR 又趁臨近新年，伸出長網向觀眾𢭃利是。
Encore 環節四子先變身 heavy metal 樂隊「死腳膠」演出，最後以〈404〉答謝歌迷：「好多謝你哋，見到你哋，我們會有信心行落去，ERROR What’s going wrong 答案係乜嘢？就係 Life must go on，We shall carry on。」阿 Dee 認真總結。
