舞台劇獎｜續無藝發局資助的頒獎禮　喜劇《Di-Dar》掃七獎　梁祖堯：繼續努力講應講的故事

馮祿德：呢台戲一定要演落去

今次是舞台劇獎連續第二年在藝發局沒資助、康文署拒租場地下進行頒獎禮，劇協出售 40 周年紀念品，為頒獎禮籌募經費，並自資舉辦。頒獎禮繼去年後再於灣仔一間海景餐廳舉行，現場最多容納約 200 人，未有開放予公眾買票入場。

頒獎禮以 The Show Must Go On 為主題，劇協會長馮祿德開場發言表示，這個主題意義是「無論如何，呢台戲一定要演落去，我們戲劇人就是這樣。」他稱，劇場人無論籌備、演出的戲劇好多時都會遇到困難，想盡辦法救個戲，就是他們的基本態度。

「我們戲劇人就是這樣，無論遇到咩困境，我們都堅守我們的理想，秉持我們的信念，努力向上，奮力向前。」

台上不少得獎者都對堅持頒獎禮 must go on 的劇協表示感激，例如憑香港話劇團《半桶水》獲最佳導演（喜劇／鬧劇）的盧宜敬就在台上表示，「原來好多嘢唔係必然，點解我能夠企喺度，呢件事好神奇，仲要係資源咁短缺嘅情況下，仍然有一班人，願意去搞一個獎，去鼓勵劇界繼續向前行，鼓勵一班真係好喜歡戲劇嘅人，繼續去做佢哋喜歡做嘅事。佢哋真係好偉大，我好想多謝劇協，多謝祿叔（馮祿德）。」

晴天林奪最佳填詞：多謝 YouTube

全晚頒獎禮氣氛高漲，台上台下很多都是相識多年的劇場人，打成一片。但亦有新面孔首次入圍即獲獎而回。

經常發表改編歌曲、諷刺時弊的網絡歌手晴天林，以風車草劇團《Di-Dar》獲最佳填詞。他甫上台接過獎座，即說一句，「大癲喎，呢單嘢。」

他續道，以往會在自己的 YouTube 頻道「自己搞個頒獎禮，然後自己整個獎比自己」，今次是第一次獲正式的獎項，多謝劇協和評審，多謝風車草劇團和台前幕後工作人員，「你哋係一個好大膽嘅團隊，題材咁大膽嘅 show，可以擺上一個舞台，最大膽就係搵我填詞。」

最後他道，要多謝YouTube，「雖然我成日俾 YouTube 黃標，但係都係因為 YouTube 大家先至搵到我。」並希望大家留意和支持即將重演的《Di-Dar》，將會有新的改詞作品。

曾為中英劇團全職演員，近年出演多部電影並獲提名金像獎最佳男主角、最佳新演員的梁仲恆，則憑風車草劇團《餐廳》獲得最佳男配角（悲劇／正劇）。梁仲恆在台上難以置信道：「多謝大家，我恨咗好耐，好正啊！」

他在台上多謝劇協，多謝風車草劇團三子邵美君、梁祖堯及湯駿業，「呢個圈子入面好多人都會將愛掛喺口邊，你哋係好少數真係會做嘅人，我好尊重你哋，好愛你哋。」他又多謝中英劇團，家人和一眾前輩、長輩和朋友們，包括黃呈欣。

蘇玉華封劇后：同將戲劇土壤一路灌溉

還有不少活躍影壇的演員，有份入圍今屆舞台劇獎，包括憑《香港式離婚》再度入圍劇帝的黃子華，不過他未有出席頒獎禮，而該獎項亦由出演藝君子劇團《六號病房》的鄧偉傑獲得。

近期剛演出獨腳戲、下月又有電影作品上映的卓韻芝憑《芝姐災難大全》入圍最佳女主角（喜劇／鬧劇），不敵最終得主、風車草劇團《Di-Dar》的邵美君。

至於蘇玉華則憑獨腳戲《完美證供》奪得最佳女主角（悲／正劇）。她在台上多謝原著作者、澳洲編劇 Suzie Miller 的出色劇本，「裡面每一句對白都令我好振奮，有好深刻反思，希望可以藉呢個演出，畀觀眾同等嘅震撼和反思。」

她表示能在獲獎，是團隊共同努力的成果，要多謝每一位成員。這個演出極具挑戰性，亦相當艱難，她特意多謝丈夫，兼《完美證供》導演潘燦良，笑言得知導演名字時心想「呢鋪真係以婚姻作賭注」。

她形容，和潘燦良合作此劇，過程雖然「刀光劍影，好多互片嘅時刻，黑面嘅時候」，仍要很多謝對方，「我發現我哋可以有更大嘅包容，更大嘅愛護，以戲劇之名，我哋可以咁樣合作，如果沒有你，我不可能完成呢個任務。」

最後她多謝劇協，希望舞台劇獎頒獎禮能一直舉辦下去，年輕劇場人繼續努力，「你哋就係我哋嘅將來」，發言末段她說，「我哋一齊努力，一齊令香港戲劇繼續發展落去，將戲劇呢個土壤一路灌溉，令我哋嘅下一代，喺戲劇路上能行一條好出色嘅路，一齊加油，一齊努力。」

《完美證供》為獨腳戲，改編自澳洲劇本 Prima Facie ，講述一位如日中天的女大律師從性侵案的辯護方，轉為案中的受害者，由此以一切被顛覆的價值觀叩問法律及制度存在的意義。蘇玉華其中一句對白擲地有聲：「我淨係知道，喺某個地方，某個時候，以某種方式，某啲事情，必需要有所改變。」

故事作為救贖

近年香港社會環境出現不少改變，劇場人則視說好自己想說的故事為一種責任。

最佳女配角 (悲劇／正劇)、《一樓一會》阮韻珊在台上哽咽流淚，並在發言末段，引用促使她入行的雄仔叔叔一句「Storytelling is a rescure operation」：「喺我的生命入面我俾好多故事救贖過，亦因為創作自己的故事得到救贖，所以我祝願我們劇場人可以繼續有足夠的空間和資源，去創作我們喜歡的故事，繼續這個救贖行動。」

憑《Di-Dar》獲最佳男主角（喜劇／鬧劇）的梁祖堯在台上表現十分感觸，眼泛淚光，數度深呼吸，他說，戲劇的道路不容易走，「我呢一刻係真係感動」，他多謝風車草劇團拍檔邵美君、湯駿業，「我哋行咗 20 幾年，無 X 啦啦，我好愛你哋。」

他續道，今晚無論誰獲獎，有沒有提名都是開心的事，因為大家都很熱愛這行業，「我哋行咗好多好多好困難嘅路，但係我哋會堅持落去，繼續行落去，冇嘢阻到我哋。冇，嘢，阻到我哋。」

「我哋想講嘅嘢，我哋會努力去講，我哋會用智慧，因為智慧係我哋自己賺返嚟嘅。我哋會繼續做，會繼續努力，繼續去愛我哋嘅城市，繼續愛我哋大家， I love you all！ I love you。」

梁祖堯封劇帝：冇嘢阻到我哋繼續堅持

劇協會長馮祿德（祿叔）負責頒發壓軸的最佳製作獎，他表示，劇協一定會繼續舉辦舞台劇獎頒獎禮，無論是盛大抑或經濟，只要精神仍在，都會盡力讓年輕的劇場人有機會盡情吐露感言，「呢啲係我哋香港嘅未來，香港嘅文化產業。」

他又寄語年輕的劇場人，只要有信念，熱愛戲劇藝術，「忠於我們所愛，係合法、合情、合理，婉轉表達我哋嘅心意，我哋就係成功，各位繼續努力。」

這大獎最終由風車草劇團《Di-Dar》奪得，為該劇今晚第七個獎項。團隊上台領獎，創辦人梁祖堯代表發言，他勉勵劇場同業，一定要互相支持落去，「我哋一定要互相團結，因為我哋都好愛大家，我哋都有同一個理想，要將真善美繼續喺劇場上發揚光大。劇場係一個好大好大嘅力量，我哋能做到。」

他續說，在這個世界都很不快樂的時候，要做一個喜劇讓大家笑，需要很厚面皮，也很不容易，但是仍然嘗試去做，「我哋真係好努力，努力係嚟自我哋好愛香港劇場，好想繼續去講我哋想講嘅故仔。每一次謝幕我都會講，希望大家繼續支持香港劇場，同埋舞台劇作品，只要你哋繼續支持，我哋會繼續講應該講嘅故事。I love you all。」

延伸閱讀:

報道｜康文署擬舞台工程四級制 劇協質疑扼殺劇團生存：劇場運作與演唱會不同 報道｜藝發局指頒獎禮安排「不尋常」停資助　康文署拒借場　香港舞台劇獎遭封殺　莊梅岩：劇協光明正大 專訪｜朱栢康　一個香港演員的高山與低谷