姜濤昨午於西環墮海獲救，引起高度關注。今天他復工，下午先出席歌迷見面會，晚上啟程到巴黎前，於機場外見記者，有約二百名「姜糖」到場支持。
晚上約十時，現場已有大批歌迷在行人路上等候偶像，隔著姜濤到達時間漸近，每見有車經過，歌迷們都會呼叫。近十時半，姜濤抵達現場，歌迷即大叫「姜濤加油！姜濤加油！」為偶像打氣。
姜濤見記者時表示，原本公司都想安排他休息，不建議他復工，但他認為外界有很多謠言、猜測，希望出來闢謠，「我係冇事，係自己的意願，想出來做嘢。」
問及事發經過，姜濤稱純屬意外，「自己因為跑步時想坐喺海邊，因為尋日天氣都好好……想坐喺海邊，睇吓夕陽，係囉，呢排自己又有少少唔舒服，想做下運動出下汗，咁就……做了一個唔好的示範，跨過了欄杆…但我起身諗住返去時，就有少少暈，跌咗落去。」
有記者問他是否有情緒問題，姜濤即時否認，但就承認當時因頭痛而服用了少許止痛藥，亦有喝「少少」酒，但未有回應為何喝酒，只稱自己不是借酒消愁，平時會打波來排解情緒。
（完整問答全文請看文末）
為偶像打氣的歌迷們
姜糖 W 向記者表示，昨晚寢食難安，查看 Threads 直至今早四點，看到 Haters 的留言會「比較唔開心，啲人喺度亂噏、好衰」，但自己會正面應對，因為「好知阿姜嘅為人」。
她表示，不相信姜濤有飲酒，因為「跑步點會飲酒」，又估計姜越欄的原因：「明星嚟㗎嘛，無理由坐地下」，認為他因此攀越欄杆，腳痛失足墮海。她指每位「姜糖」都知道姜濤一直有在表演前做運動的習慣，平日都跑同一條路線。
另一位姜糖 Gigi 則分享昨天從新聞得知偶像墮海的反應，只有「喊」、「飯都無食」，對 haters 的看法則「已經睇化了」。她說要感謝昨天幫忙救人的市民：「好感謝救佢嘅市民，救起咗我哋最愛嘅人。」
對於公司 Makerville 的做法，認為「公司平時無反應，今次最有反應」，但她就不認同姜濤有過勞的情況出現，相信只是為 fashion show 跑步減肥而中暑。
陳小姐稱今晚到場是為了「送上祝福、表示支持」，對昨日意外表示驚訝，但不會過多猜測，「人無事就得。」她剛參加完麥花臣的活動，認為姜濤仍然靚仔，亦有講有笑，「邊個跌完落個海度剛都會驚嚇，驚嚇完咗（今日表現淡定）其實佢都好叻仔。」
以下為 Wave. 記者記錄的答問全文：
（姜以手勢示意對面馬路的粉絲安靜）
■ 你身體狀況點？
冇事冇事，醫生 check 過，都安好，唔使擔心
■ 醫生批准你工作？
係呀係呀，同埋我覺得自己身體無乜大礙，今日都如常工作。
■ 係咪有刮傷？
少少……手部有少少 high 到。
■ 點解咁快復工？
本身公司都想我抖下嘅，大家都唔建議我出嚟。但我覺得好似，出面有好多謠言同猜測，如果我唔出嚟，事情繼續會謠言四起，所以我想話畀大家聽，我係冇事，係自己的意願，想出來做嘢。
■ 尋日發生咩事？
多謝大家關心。尋日其實純粹係一個意外，自己因為跑步時想坐喺海邊，因為尋日天氣都好好……想坐喺海邊，睇吓夕陽，係囉，呢排自己又有少少唔舒服，想做下運動出下汗，咁就……做了一個唔好的示範，跨過了欄杆，因為平時見到有人在欄杆外釣魚，chill 下，自己都想放鬆下……但我起身諗住返去時，就有少少暈，跌咗落去，所以都係好意外的事。
■ 第一次跨過個欄？
第一次亦係最後一次，希望大家唔好……欄杆係有佢的功效。
■ 有報道話你飲過酒同埋食過藥？
係囉，有少少唔舒服囉，所以就……（關你的情緒問題？）情緒？情緒…無呀，情緒不嬲都…我諗係大家太關心我啫…所有朋友、fans 不嬲都好擔心呢啲嘢
■ 有食藥？
有有有，食少少止痛藥，因為頭好痛。
■ 點解飲酒？
飲酒？少少……少少
■ 係咪去到醉？
我諗唔係最大因素，主要係自己唔小心
■ 你唔係借酒消愁？
我好少會咁樣，我唔會用嚟消愁……不嬲都係打下波咁
■ 跨返入去時跌？
係呀係呀，跣咗一下
■ （問題不明）
本身我跌落去嗰下係唔知嘅，真係落到水先，嘩咩事。所以好多謝所有……撈我上嚟的…救護人員
■ 識唔識游水？
其實本身識嘅，但好耐無游……因為無預估到呢個情況
多謝有些好心的人，有畀個救生圈我，好抱歉呢件事佔用好多公共資源，大家唔使擔心
■ 見面會臨時取消的原因？
公司不想我們太辛苦，但我們自己覺得既然來到，不想fans失望，都見一見，會另外擇日再舉行，到時有完整 fans meet 畀大家
■ 會否放長假？
放咗㗎喇，公司有放，多謝
■ 有咩想同姜糖講？
陣間同佢哋講
（雙手合十向記者示意後轉身，向歌迷揮手、畀心、合十後離開）
記者／Avril Cheng
