獨立樂隊晚安莉莉的組成，源於 Sinnie 大學時找人幫手整歌，大家初合作就覺得好夾，決定埋班夾 band。但成軍頭 4 年，成員各有不同身分在忙，後來 Sinnie 大學畢業參加《全民造星IV》，加入女團 Lolly Talk 而廣為人知。期間樂隊活動雖沒有完全沉寂，一直有周圍出 show，為了「無咁悶」，除了 cover 也有原創，但只維持着低度經營。
初時晚安莉莉的表演只有 live 和網上 fancam 片，慢慢累積了知名度，那些本來當 demo 在玩的原創歌，也愈來愈多 fans 問幾時會出，成員心裡漸漸有這想法。轉捩點是 2024 年中尾左右，幾名成員恰巧相繼離開全職，大家覺得似乎時機已到，有日 keyboard 水金在群組開口問，「我哋幾時出歌？」
於是 2025 年晚安莉莉全速前進，半年間發布了三首單曲、一隻 EP《Goodnight,Lillie》，在東蒲辦專場 … 如蓄勢數年的花火，一口氣綻放，在 Chill Club、港台均贏得新人獎，甚至成為叱咤「我最喜愛組合」五強，亦將以年度新人的姿態，在 6 月 28 日登上亞博《KKBOX 香港風雲榜》舞台。
花火綻放後，天空歸於黑暗，胸腔留下的悸動卻會永遠延續，他們希望晚安莉莉能走到更遠的地方，「過了新人年，好像壯大了一點，要有跟其他 band 一樣的質素、一樣的 level，會有一點這個想法；同時，今年希望可以去多些不同地方去玩，參加多些 Festival，做到真 band 仔。」
對世界說聲晚安
晚安莉莉是香港少見的雙主音編制樂隊，成員包括主音 Sinnie、主音兼 bass 手阿雞、結他手 Yam、結他手阿政、keyboard 水金、鼓手小伍。六人年紀相若，都是音樂人，埋班的故事就像《海賊王》路飛找同伴出海，Sinnie 中學時在樂隊比賽認識另一隊的 Yam，大學時在比賽認識另一隊的阿政，疫情時玩 cover 歌認識網友阿雞，再因為 Yam 相繼認識水金、小伍。當時 Sinnie 正創作個人的心情系列作品，包括〈失眠時我會呆望窗外等待你的來電〉、〈臉紅時我想看穿你的心臟〉等，於是把他們都找來幫忙。
原意是幫 Sinnie 做歌任樂手，六人由初次合作已經覺得彼此很有默契，阿雞形容感覺是「feels like home」，「因為真係好夾喎，可能平時出去幫其他 artist 彈嗰啲，都冇呢種夾喎，嗰時其實已經覺得，唔得喇，我哋要夾 band，所以其實那時『晚安莉莉』個班底已形成了，但係因為嗰個係佢（Sinnie）嘅一個系列，所以點都要叫做完咗先。」
最初幾年出 show，名稱有時是「晚安莉莉」，有時是「Sinnie@晚安莉莉」，對他們來說都是同一回事，只是「名份上的東西」，Yam 則覺得分別是心態上是否要服務歌曲，「有個續寫句子的想法，Sinnie 寫咗首歌或者有個 idea，我哋幫佢實現個願望出來；但係如果『晚安莉莉』title 的作品，真係要屬於各人嘅聲音，擺落去首歌度，show 呢隊 band 嘅多啲，大家係傾過度過，同埋做出嚟先係比較完整。」
阿雞聞言忙不迭點頭補充，「同埋最重要嗰樣嘢，晚安莉莉的作品，我有得唱歌吖嘛！呢個緊要呀，佢 Sinnie Ng （的時候）我無得出聲。」大家笑着附和。
成員都喜歡 J rock、動漫，也聽台灣 band，「晚安莉莉」名字由來，卻跟這些沒大關係，源於一次 Sinnie 逛誠品，在書架上看見一本書叫《Good morning Midnight》 ，作者叫 Lily Brooks-Dalton，靈機一觸就起了樂隊名字叫「晚安莉莉」，希望聽歌的人，不管每天過得是好是壞，都可以好好跟自己說一聲「晚安」。
月色很美
一開始只是想一齊夾 band，沒有想甚麼目標，因為不想每次出 show 都只玩 cover，他們就寫一些原創歌，都是為玩得開心，Sinnie 說，想做到像一些台灣 indie band 那樣，「唔止係講緊曲風、style，而係講緊點樣營運佢哋嘅方法，就係 friend，然後一齊夾 band，開心；然後，出自己喜歡嘅音樂；然後，型！威！yeah！咁樣囉。」
要數第一首屬於晚安莉莉的創作，是 2023 年時的 demo 版〈我看見今晚的月色很美，你呢？〉，記錄阿雞在一次戀情中向對方表白的心情，Sinnie 寫詞以日本作家夏目漱石 “I love you” 翻譯為「月色很美」的典故作為靈感，意境羞澀浪漫，曲風卻是節奏明快、充滿爆發力的 J-Rock，很快成為他們的代表作，吸引到年輕樂迷注意，YouTube 的 fancam 片累積數十萬瀏覽量。
觀眾的支持慢慢給了他們繼續創作的信心，「去到真係寫咗自己嘅嘢，出咗幾次 show，觀眾睇到，佢哋嘅反應，係會令到我哋大家都幾士氣提升，會 look forward to 寫下一首歌，look forward to 將呢件事變成一隻 EP。」想法慢慢醞釀，但現實的考量讓他們遲遲未有實行，Sinnie 說，「都想出歌，但係首先第一樣好實際錢啦，唔係咁容易話出就出，capital 要用得合時同埋合理…因為出歌仲有好多其他嘅 expenditure，例如 MV、promotion，所以嗰個時期我哋未有能力 afford 到，或者未有信心，覺得跑返嚟嘅 show 可以 afford 到。」小伍認同，「好似盡咗嗰陣時嘅努力先，儲咗一堆歌，之後先再去 expand。」
晚安莉莉成員都是 slasher，其中水金在 office 做文職，同時是樂隊 Ragpickers、Kowloon K 成員，阿政是產業測量師，Yam 在琴行任銷售。轉捩點發生在 2024 年中尾，那段時間恰巧幾名成員相繼離開全職，阿雞則是失戀，大家覺得似乎是時候付諸行動，「係有 gather 埋一齊開會傾，究竟嚟緊係咪呢一年，即係 2025 年的時候，點樣去做呢件事呢？第一首出嘅歌會係邊首，點樣嘅歌呢？係重新寫，定係用之前寫過嘅歌，定係點樣。」
決定全力發展晚安莉莉，2025 年他們開始衝刺，5 月時以〈當昨日凝視着我〉派台出道，改編自原創國語版 demo〈三天是我單戀你的時間〉，主題由愛情變成探討過去與當下的關係，叩問如果執着於過去，怎樣面對未來的人生。阿雞說，討論用邊首歌出道時，不想用寫歌的次序來定，那樣「唔夠 organic」，應該是挑選適合時機的作品，「點解〈昨日〉as 我哋面世嘅第一首歌，因為嗰首叫做比較 represent 到我哋六個人分別嘅（特色）出來，（男聲）唱得多啲啦，又有得彈木結他，有一段吵 band sound，有一段靜靜哋，又可以玩吓五拍。」
時代很差嗎？
誰願結伴回家
可否捉緊我 說別怕？
記憶通通已 火化
〈當昨日凝視着我〉詞／周國賢
共通語言
晚安莉莉的成員都是中學已開始學樂器、玩夾 band，音樂養分來自動漫、J pop，和台灣 indie、歐美經典、金屬搖滾等，當中也有本地樂隊的影響，例如 KOLOR、ToNick、Dear Jane 等，例如 Sinnie 分享，中學時其中一首常表演的歌就是〈不許你注定一人〉，「出親嗰啲 Christmas Ball 就一定會玩」。阿政記得，想學結他是因為 Beyond，「講返 2008 年四川地震，當時首賬災歌在電視播，係改編自〈海闊天空〉，叫 〈承諾〉，我四年班，聽到首歌覺得幾上腦，去到五、六年班，YouTube 開始變得 accessible，先開始了解原來有個樂器叫結他，升中一時就開始學。」
水金憶述，自己在中五開始夾 band，「我覺得我應該係經歷緊嗰陣一個 band scene 幾鼎盛嘅年代，應該就係 Mr. 同 RubberBand 爭得最犀利嗰幾年，我記得佢哋（Mr.）喺頒獎禮攞冠軍，好快就開紅館，嗰陣我唔係好想像到一隊 band 可以開紅館。睇到好開心，enjoy 夾佢哋啲歌。再大個啲，就慢慢有 Supper Moment、Dear Jane，不時會夾下。」
也有受到家人鼓勵的，如 Yam 中學時夾 band 玩《K-ON！輕音部》的歌，同樣喜歡動漫的舅父知道，就帶他去琴行，送給他人生第一支結他，「而家諗番起，佢唔送支結他畀我，我可能會揀咗其他樂器。」阿雞開始玩音樂的契機則比較特別，「我讀男女校，咁男仔夾 band 嘅原因都好簡單，覺得夾 band 好有型，覺得攞起支結他就會識女仔。嗰陣我寫咗首歌俾個女仔，但係，就失敗咗嘅。失敗咗就覺得，係咪首歌唔夠勁呢？咁就開始認真鑽研。」
開始以晚安莉莉班底夾 band 後，成員經常在群組分享喜愛的音樂，發現共同的音樂語言是 J rock，創作自然也向這方向走。不過成員都身兼數職，他們坦言真正聚在一起練習的時間不多，晚安莉莉由成軍至今，一直未有屬於自己的 band 房，都是「寄生」在其他樂隊、小伍教鼓的 studio。水金解釋，過去一般的模式是阿雞會做一些 demo 及編曲，成員在此基礎上再改動和演繹，很少聚在一起去砌，「因為大家工作都繁忙，通常作曲嗰啲我哋就線下完成，通常都係出 show 需要練習嘅時候，我哋先會聚埋一齊。」
這種獨特的夾 band 模式，是現實所限，也來自成員間的默契，Sinnie 說，目前仍未有計劃物色 band 房，「我覺得件事係 organic 嘅，約唔到，咁不如 online 夾住先，突然間就習慣咗。」而且她覺得借用 studio ，心態上會覺得不要佔用地方太久，或麻煩別人太多，反而會令每次練習更有效率，不會太懶散。
往新天地去
阿雞覺得，成員間可以維繫感情，因為大家「好夾」，大部分都是 MBTI 裡的 J 人和 N 人，即較有計劃、直覺型，「我哋都鍾意啲深度啲嘅嘢，成日都會無啦啦開咗個哲學台，可能講下你覺得咩係藝術，然後就傾咗成晚。第二就係，大家唔同嘅嘢都互相磨合到，可能有啲人比較衝動，例如我，有啲人就比較深思熟慮，有時諗得太耐，我有個不耐煩去 push 大家。所以我覺得，『夾 band 先夾人』呢樣嘢，大家個性格係真係好夾。」
小伍則表示，對她來說晚安莉莉是令人安心的所在，「我哋夾到依家，中間其實各自都有不同工作，呢兩年開始發現，我喺出面做完樂手嘅工作之後，返番嚟我隊 band，係真係可以好放鬆，即係出面係唔容許錯，好大壓力。」Yam 即搞笑搭話，「唔係㗎，我哋都唔容許。」眾人笑作一團，說試過出 show 的時候有人彈錯，大家邊望邊笑到完場，「我哋係笑住唔容許，哈哈。」
晚安莉莉的 EP《Goodnight,Lillie》中最後一首歌正正就叫〈晚安莉莉〉，有一句歌詞是這樣的，「面對怯慌／難以迴避／仍做你司機」，除了記錄平時出完 show 或練習後，阿政會揸車把成員港九新界送回家的情景，也是述說彼此在車程上聊天、互相陪伴的深夜時光，填詞的 Sinnie 道，「 （歌詞）連住一齊睇其中一樣嘢就係講緊，我哋可能夾完 band、收工，車大家走嘅時候，一路喺架車傾計，講自己心事（的場景）。」
出 EP、辦專場、獲獎，〈月色〉MV 在 YouTube 已累計三百萬 views，晚安莉莉的新人年可說過得如花火燦爛。6 月 28 日將在亞博舉行的《KKBOX 香港風雲榜》，晚安莉莉還將以年度新人身分帶來表演，他們表示，獲獎是一支強心針，代表晚安莉莉的音樂被喜愛，又賣關子道將與一位「好 nice 的前輩」有 collab，正改編對方一首膾炙人口的歌，加入新元素，「希望到時嘅火花大家都鍾意。」
邁向新階段，成員有壓力，也有期待，創作上希望有新嘗試，例如他們今年 5 月去東京下北沢演出時，試過開一個 writing session 坐在一起寫歌，「可能繼續有不同的新嘗試，出來的成品又會有些不同。」阿雞也預告，今年會有不同以往風格的作品出現，「我覺得新人年的時候，我們很步步為營，很 care 究竟世界怎樣看我們，很 care 去將自己最好的一面 show 給世界聽，很 care 去定義什麼是晚安莉莉。反而今年是很好的一年，去做一些我們去年不敢做的事。」
文／Sophie
攝／Nasha Chan
Makeup Artists:
Debby Chan @dc_style_makeup_
Nana Cheung @nanacheungg
Hair Stylists
Ding Cheung @ding_hair
Mario Chow @mario_chow0205
《Katch 音樂娛樂平台呈獻：第八屆 KKBOX 香港風雲榜 － Music Reborn》
日期：2026年6月28日（星期日）
時間：7:00PM（6:15 PM 起進行暖場活動）
地點：亞洲國際博覽館 AsiaWorld-Arena
