編按：林家謙七場紅館演唱會昨（28 日）晚尾場，唱完最後一首〈邊一個發明了 ENCORE〉後，一身黑色禮服造型的林家謙，謝幕時哽咽向觀眾說了以下一番話：
其實做呢個騷一啲都唔容易，除咗好多外在環境因素，要每日拆彈，我覺得要過最大關口係自己，一直好似覺得大家鍾意我真係僥倖，for 呢個騷，我真係唔夠歌，同埋我自己唱歌方面都唔係好大信心，所以一直唔會諗開騷呢樣嘢……多謝 Alex（演唱會總監），一年前佢主動提議幫我入紙，佢話，入咗紙，都唔係一次就批，入定先，兩三年後再算，點知佢一入就批。
有呢個期之後我好努力做好多歌、出碟，因為我想喺個騷唱多啲自己嘅歌，我唔想唱太多人哋嘅歌，但望住 rundown 我覺得好沮喪，好似砌極都砌唔夠歌，跟住又覺得自己唱方面又唔係好夠能力，所以呢段時間，我有好幾次想取消個 show，甚至在開騷前兩星期，我都仲諗住取消。
多謝阿神（Tyson Yoshi），多謝阿樹（Serrini），佢哋每日都鼓勵我，有晚林夕打畀我，我自己練緊歌，練得好沮喪，自己唱唔好，唔知點解佢打嚟，講咗一啲好好嘅說話，令我有番力量再繼續做呢件事，所以多謝夕爺。
我好想多謝一路以來，陪伴住我嘅音樂伙伴同前輩，我想多謝 Wyman，因為呢個騷佢幫我寫咗一首，好似演唱會嘅主題曲，但其實佢唔止係一隻演唱會嘅主題曲，仲覆蓋人生所有嘢，我哋所有人、所有嘅嘢，其實好多都冇得encore。
佢嘅靈感係嚟自於一個喺星期日晚，或者暑假尾會喊嘅小朋友，literally 一到呢個時間，星期日晚佢就會喊，自己好唔捨得所有發生過嘅好事，但大個發覺好多嘢，其實都唔使encore，只要記住佢嘅發生過，就會好好咁存在喺你心入面，就已足夠。
好多人睇完呢七晚 show，其實就會離開，離開我們這個城市。去第二個城市，繼續過他的生活。
希望你們飛走之後，還會記住這城市的所有一切。
希望你們會記住這個 show，這七晚的所有美好，好好保護心中那團火。我們某年夏天再相聚。多謝你們。
語畢，林家謙徐徐離開舞台，完成這七晚演出。
圖片來源：Oiyan Chan
