報道｜倫敦直擊 RubberBand：呢度都係自己人！

RubberBand 昨晚在可容納 12,500 人的倫敦 OVO Arena Wembley 舉行《Ciao》World Tour 首站。一開場，主音 6 號即高呼：「我哋係香港嘅 RubberBand」，又宣布：「今日 2023 年 3 月 24 號，RubberBand 嚟到倫敦！」

觀眾席座上客有黃偉文、傅家俊、黃心穎、Tim Lui 等。唱出《挾持》前，主音 6 號特意感謝填詞人黃偉文，稱希望把這首歌送給黃偉文，同時送給所有朋友，黃偉文聽畢舉杯示意。6 號又說，到倫敦後跟黃偉文吃飯，言談之間，覺得「佢寫廣東歌詞的火係好猛好猛」，全場掌聲雷動。

這一夜，觀眾席上還有大批香港人。

記者現場所見，到場歌迷絕大部分為港人，亦有少數英國本地人。倫敦街頭同一時間聚集大量講廣東話的港人，可算蔚為奇觀。有移英港人表示，這夜感覺像一刻回到香港，「未試過見到咁多香港人」。

主音 6 號形容，「被明白」從來都是所有樂隊追求的目標，RubberBand 特別感謝歌迷多年來的明白，「嚟到呢度都係自己人！」現場歡呼，氣氛熱烈。

演唱會上數次發生小失誤，結他手阿偉笑 6 號是否仍受 Jet lag 影響，但 6 號指是自己戇居，又表示演出前十分緊張。「我哋會繼續努力，就嚟到半百，但都會繼續努力。因為音樂畀到 connection 我哋幾個，都畀到我哋同你哋（之間）。」

「時代變好、變壞，我哋繼續寫歌；距離有遠、有近，我哋繼續寫歌。唔知呢，其實原來以為好遠，又可以咁近。好搞笑，但真係呢一刻，多謝你哋送俾我哋好超現實、好 surreal 嘅一個 moment，多謝你哋！」

「終有一日會再見」

演唱會佈幕上不少投影都是熟悉的香港景色，例如天橋、公共屋邨、街道。唱完《這刻我們》，6 號就形容，整場演唱會「好似喺香港開 Show 咁」。

有些傳統，也由香港搬到了倫敦。例如演唱《睜開眼》時， RubberBand 按一貫做法，全場及舞台燈熄滅，只餘下台前一排白色射燈。

再黑的時候，我哋有大家。唔使驚，唔使怕。再黑的時候，更加要睜開雙眼。」6 號說。

演唱會也有不少感性時刻。唱 《Ciao》之前，6 號就說，他們寫此曲的時候，想像的正是當下面對眼前移民港人的景象，「我希望我控制到自己眼淚」，又想借觀眾掌聲獻給在場的太太、RubberBand 填詞人 Tim Lui。

6 號又說，來到這一刻能夠和大家見面，用了很多努力，「中間講咗好多再見、好多 Hello 先嚟到呢一刻」。唱《練習說再見》及《Hello?》前，6 號感性稱，這兩首歌是從香港帶來的手信，就算香港人需要不停練習講再見和 hello，「終有一日我哋會見到大家。」

Encore 《未來見》前，6 號發言表示，很高興亮燈後可以見到大家的模樣，亦希望能再有機會見到大家，「因為真係好唔容易啊，好唔容易，我唔係揾藉口去將失誤去咩…而係，頭先阿泥（鼓手泥鯭）係咁畀信心我，響後面的時候，我一諗起我喺倫敦，可以同隊友一齊唱歌，由簽約做唱片公司，只係做校園 show… 到今日 2023 可以有自己的 Ｗorld tour，係好唔容易，好多謝你哋係第一批去見證。」

現場氣氛熱烈，Encore 了多首歌曲後觀眾仍意猶未盡不肯離開，6 號一度表示擔心大家沒有交通回家，現場不少觀眾紛紛大叫說，倫敦星期五有通宵地下鐵，6 號笑言 「都係文明社會黎」。最後再 encore 了《Simple Love Song》及《一早地下鐵》兩首歌才結束。

攝／PW、Joey Kwok

---