姜濤 LAVA 演唱會：照顧自己內心小孩，不必與 MIRROR 隊友比較

MIRROR 成員姜濤於亞博 Arena 舉行一連九場個人演唱會《KEUNG TO “LAVA” LIVE 2025》，日前（26 日）落幕。演唱會原先設計有大量火焰元素，但因應上月的大埔火災，不少內容因而修改，但核心主題「重生」則不變。姜濤形容，歌單編排總結了他入行七年的轉變與成長，也包括一些懺悔。

「我們每個人生活在這世上，每日那麼努力，就是希望自己變得更加好，更加完整，更加坦誠。我們一起行這條路，也相信大家睇完演唱會，可以在自己生活入面找到更好的動力，我們一齊成為 better man。」

LAVA 是姜濤出道以來第二次大型個人演唱會，而在尾場舞台上，姜濤全晚多次形容心情緊張，因為是最後一場、也要錄影，但這九場演出對自己而言是好好的旅程，「分享自己對人生的心得、睇法，感恩所有人，無論第一次來睇還是已睇幾多晚，衷心多謝你們，因為有你們我才可以做得成。」

個唱以〈Boulder〉、〈白果〉、〈Master Class〉等歌曲開場，後經〈黑月〉、〈DUMMY〉、〈鏡中鏡〉、〈孤獨病〉等作品叩問內心。尾場唱〈Every Single Time〉後段，COLLAR 成員許軼（Day）以一身黑色露膊開衩裙現身舞台，與姜濤跳貼身舞，粉絲尖叫。

唱〈好得太過份〉前，姜濤有感而發，呼籲在場歌迷要多謝自己。「我覺得，最緊要多謝你哋自己，多謝我哋內心嘅 inner child……」他反思以往自身，「過去我太少多謝自己，一直覺得自己好無自信，或自覺做得唔好，成日都會忽略自己感受，現在才發覺同自己坦誠地交流，係好開心好平靜。所以你哋除咗關注我，都可關注自身，照顧好自己內心嘅小孩，對佢哋好啲。」

而演唱會尾聲跟隊友兼尾場嘉賓陳卓賢 (Ian) 合唱〈你要倔強〉及〈留一天與你喘息〉後，姜濤的發言再一次談及專注自身。

他想起，剛剛認識 Ian 時很羨慕對方：「佢係運動健將，身材又好，靚仔，又識作詞作曲，讀書又咁叻，咁完美的人。但後尾覺得，可以欣賞人哋，但我哋每一個人唔需要同任何人比較。」所指的不止 Ian，還有其他 MIRROR 成員：

「每個人都有自己發光發亮嘅一面，所以唔需要同人比較，所以我都會懂得欣賞自己同人哋，抱住愛嘅眼光去欣賞每一位我哋鍾意嘅人，唔鍾意咪唔好望佢囉，可以點？鍾意就記得好好欣賞，唔好覺得呢個好啲，幾十年後，大家咪都係阿伯阿婆，有咩分別？沒有啦！」

Encore 時段，姜濤先唱出給亡友的〈Dear My Friend,〉，他坦言本身不打算唱這首歌，但當日坐車到演唱會場地時閉目與亡友交流，「問佢：『今日最後一場，老友，你想唔想我唱呢首歌？』」他說，雖然聽不到對方回應，但既然為他創作了一首歌，「事隔2年，我想試吓再唱一次呢首歌俾佢，希望也可畀大家一啲力量。」

除了獻給亡友，他也希望〈Dear Friend,〉可以為經歷過大埔火災等事件的香港觀眾排解一些情緒，「知道呢段時間，大家都經歷好大傷痛，所以想送畀自己呢位朋友，亦想送畀正經歷傷痛嘅人，可能一啲我哋最重要嘅人離開我哋，都希望你哋可以帶住佢哋嗰份力量一齊行落去。」