2025 轉個彎就到，大家也被各式回顧、盤點洗版了嗎？
即將嚟到的頒獎禮、十大票房最高電影、十大最熱門搜尋電視劇 … 以外，《Wave.》還想關心一下，這一年大家有甚麼最喜歡的電影、電視、音樂作品？這些作品打動你的原因又是什麼？
於是我們透過 FB、IG、Threads 徵集讀者的 2024 推介，它不是甚麼人氣投票，我們不會嘗試整理什麼十大數據，反而希望大家可以寫多兩句，真誠略述自己最喜歡某首歌、某部電影、某部劇的原因…
最後我們獲得逾百讀者的回應，以下是《Wave.》讀者的 2024 心水 — 電影篇。
《破．地獄》
戲內的父女關係觸動到我（喺戲院喊到眼腫😢）情況同我原生家庭係差唔多！我父親係傳統型嗰種，內歛唔善於表達感情，同佢少溝通，因為一出聲多數都係鬧交收場。不過而家已經再冇機會和解，同戲入面「Hello 文」個結局咁，佢舊年已經離開咗呢個世界了…
— Caca
大家可能曾經面對過或者未經歷呢一個情況，呢一套戲可以加深認識之餘同埋好值得自己去沉澱一下去反思自己同親人朋友關係，搵返自己個位置同價值觀。
— Wen
除了電影本身有感動到我，還引起香港前所未有的生死教育文化浪潮，把生前後事的安排，帶到非常入屋及無忌諱 。
— 天
《我談的那場戀愛》
結局意想不到、各演員做得好、配樂&主題曲動聽、人靚景靚、好睇! 睇完好想去札榥。
— Amy
好喜歡電影嘅節奏同氣氛，令我感受到一份從未有過嘅浪漫，彷彿參與咗一場戀愛遊戲💕
— hkpopculturelover
《填詞 L》
香港追夢好難但仍有好多人不屈不撓地追逐，需要的是勇氣同好多好多堅持，對於一直覺得搵唔到自己夢想嘅我而言，總會被深深觸動
— Deer
導演用自己故事講「追夢」係非必然成功，但上天亦可以奇怪嘅方式咁俾返回報自己。呢個奇怪而平凡嘅生命循環，好值得同覺得自己「失敗」嘅人分享。
— mw
（延伸閱讀：鍾雪瑩 ╳ 黃綺琳：當填詞 L 遇上電影 L，又或相反）
《九龍城寨之圍城》
場景非常仔細，完成度非常之高，港產片打鬥場面非常好睇！
— V.B.
中意呈現出嚟主角們之間嘅牽絆🫶 另外無論係運鏡、配樂、動作設計等都好好，令我地呢班寨民完全陷入咗佢地既世界🫶🫶🫶
— Hayhaykuku
（延伸閱讀：《九龍城寨》鄭保瑞：說一個離不開留不低的香港故事）
《爸爸》
好耐未試過有一套戲係令我覺得療癒，而唔係傷痛。有啲傷痛，現實中只會一直存在，所以每個人需要面對嘅課題已經唔係點樣終止傷痛、淡忘傷痛，而係點樣與傷痛共存嘅同時，令自己繼續好好活下去。
— Kary
《爸爸》以打亂時序的方式去鋪敍一場場戲，使觀眾易進入爸爸的視角（腦袋）去感受他於案發前／後的心路歷程，或許有不少觀眾會邊看戲邊心中問自己：「如果我是片中的爸爸，今日心情那麼差，下一步要怎麽走才可令明天會更好？」
— 輝輝
很喜歡劇本的細緻、電影的剪接、演員的演出和導演的用心。很少電影作品刻畫凶案受害者/凶手家人，而電影也讓觀眾對精神病患者有初步的認識，從中可見創作者的人文精神。看完電影後幾天仍沉浸在電影的氛圍裏，想到世事無常，越發覺得《這是愛》這首歌選得真好。
— Mia
（延伸閱讀：由《踏血尋梅》到《爸爸》 翁子光：電影救不了世界，但至少點綴一些）
《久別重逢》
《久別重逢》除了令我想起年少時的音樂夢，也讓我想與那個早已遺失的自己重逢，看完內心有一股暖意，唯美的畫面和清新的插曲為電影加分
— Reflection
近年香港很多電影都係關於比較沉重嘅題目，好久違了的純愛電影！套戲睇得好舒服自然，Ekin、Nat、Ian、Ceci 都喺自己角色上發揮得好好，夾埋一齊好有驚喜！其實香港都可以做到清新愛情小品電影，而且主題係尋回自己，雖然未算好深入，但亦有令人反思嘅餘韻。
— LZ
《從今以後》
寧靜氛圍的一套電影，確實地把女同性戀的生活以及不為大眾所知的憂慮放在銀幕上，即使不屬多元群體也能重新思考人生伴侶的意義。不止是殘酷的現實，也有溫暖的感情。
— Snowy
（延伸閱讀：訪《從今以後》楊曜愷、鄧芝珊 因為一層樓，成就一個男人）
《寄了一整個春天》
雖然主題似乎係有一點爭議性，但喜歡電影拍出清新感覺，三位新演員表現亦非常亮眼
— Ming
《香港四徑大步走》
好鍾意這套紀錄片，既熱血又有靈魂！
— Iris
《臨時劫案》
油麻地槍戰有香港特色
— Jennifer
（延伸閱讀：《臨時劫案》麥啟光：一個廢中導演的自白）
《十方之地》
未必是香港觀眾看開的紀錄片，但看的過程會反思人與地的關係。
— Mak
