MIRROR 演唱會墮屏事故三個多月後，政府終公布對事件的調查報告，警方拘捕演唱會總承辦商藝能及次承辦商協興隆共 5 名高級職員。
報告公布當晚，MIRROR 12 名成員出席商業電台主辦的「903 All Star 籃球賽」，除了比賽中途受傷接受治療的姜濤，其餘 11 人賽後接受記者提問，為他們對演唱會事故調查的首次正式回應。
以下為《Wave. 流行文化誌》記者整理的答問全文紀錄，並補上一些事故的背景細節。
Q：
今日演唱會調查報告公布，對你們的心情有沒有影響？
Lokman：
心情又無乜大影響，因為一來到（活動現場）都好忙，要化妝，都只睇了不太多資料。（知道有什麼重點？）我淨係知道有超重。
Anson Kong：
知道數字有虛報，知道拉咗人，淨係知道咁多。
Q：
對調查報告滿唔滿意？
Lokman:
我覺得無得用滿唔滿意來形容，因為仲查緊，要去到最後先知係點樣一回事，我諗要再等後多少少，真係水落石出先知道。
Q：
你們曾經在這舞台上，現在報告發現咁多虛報數字，會否覺得一額汗，覺得當時好危險？
Anson Kong：
當然會有呢個感覺。因為當時我們在場只是表演，只顧表演項目，不知道所有機關、工程是怎樣，事發後這兩個月，好多人追問事情怎樣發生，我們都等緊呢個報告，到呢個報告今日出的時候，當然我們做緊嘢，我們係有一下 shocked 的，原來數字差咁遠。這是今日其中一個最大的感覺。
Q：
之前綵排已有些意外，係咪已覺得有些甩漏？
Anson Kong：
之前演唱會的甩漏同（舞台）上面（空）出事的意外完全唔關事。
Lokman：
係兩件事。
Anson Kong：
係在台面上發生的機關錯誤，我覺得機關錯誤係…可能平時的 show 已會有少少問題，可以在開 show 前解決得到的，而不是我們現在發生意外咁大的事故問題。
事發後有 MIRROR 演唱會工作人員提到，由於舞台設計及組裝時間較預期長，結果總綵排推遲了 5 小時，到了第一場演出前的凌晨才能舉行。而綵排亦多次發生意外，導致舞者 Zisac 受傷，多名舞蹈員當晚都在 IG 限時動態中表達不滿，「其實執生真係唔係無敵，執到可以笑下，執唔到呢 ？咩都唔知，我都唔知點執」、「用我哋條命去滿足你哋嘅自私自利，一次事故睇清人性醜惡」。於第四場被巨型螢幕擊中重傷的李啟言（阿 Mo）以全黑 IG 限時動態作抗議，舞蹈員出身的 MIRROR 成員 Anson Kong 的 IG 限時動態似是對事件的間接回應：「第一次係意外，第二次係大意，第三次係疏忽。」
除了有舞蹈員受傷，當晚鼓手 Padget Nanton III 亦曾連人帶鼓跌進「三四級樓梯深」的台底，幸好他未有受傷，能自行重返舞台。但總綵排被迫停止。他其後在 IG 帖文曾提及，自己在這個舞台上也有一次「很壞、很突然的經驗」，演藝生涯從未發生過。
MIRROR 頭場演出亦出現大量驚險場面，Anson Kong 在高台跳唱《虎道門》時因高台震動而失平衡，12 子唱《IGNITED》時高空橋微微傾斜，在架空步道上唱《12》時不少成員亦險些跌倒。
（見專題報道）
Q：
當日有無人覺得舞台好危險，所以拒絕上台？
Lokman:
以我們所知，就無的。因為全部人都好專心做表演。如果你問我，係咪因為一啲未 ready 好的情況而唔表演，我就唔會。因為一開頭，表演老師已教，the show must go on，所以唯一問題是要解決一些問題。
到有時真的有危危乎的情況，ER……公司同事都會講，有咩危險就 cut，如果安全起見，無任何效果都無問題，有這樣的建議。
Edan：
我們一直綵排到 on show 都覺得個台係安全的。原因是我們所講的甩漏，其實只不過是一些機關未上返來，或者機關降落 timing 未啱，是溝通上、timing 問題，而不是舞台安全問題。例如個台的六邊形係唔對喎，點樣對住觀眾，是表演上的疑問，而不是安全上…
警方昨日指，從紅館閉路電視可見，事發當日早上，涉事螢幕升降早出現問題，協興隆員工曾手動作調校，但其後再沒有人進行檢查、維修、補救。
Q：
報告指出螢幕出事當日已有問題，rehearsal 知唔知？
Anson Kong：
因為我哋每日 call time 返去都唔同，當日返去都係 focus 返前一晚個 show 有咩甩漏，改善返那一 part，所以返去踩台之前，他們處理過台、mon 的問題，我們都見唔到。
Q：
排練的時候睇唔睇到螢幕有問題?
Lokman：
排的時候，我們好少會望向上面，都係專注在舞台，對位，望下 band leader、花姐，望下其他成員，所以當時無乜留意太多，都係留意自己表演範圍內的東西。
Q：
今日有無時間同 dancer 傾過？
Lokman：
今日無時間呀。
Anson Kong：
因為收到報告時我們化緊妝，然後馬上過來，未有機會同 dancer 好好溝通呢件事。
警方昨日表示，演唱會總承辦商「藝能」是在臨開演唱會幾日前才向康文署提交文件，指如交出真實數據，需要額外時間、成本審批許可，康文署亦有機會要求安排工程師重新設計紅館天花支架等，第一場 MIRROR 演唱會未必趕及舉行，因此他估計，加快批出許可，確保演出準時舉行，就是「藝能」虛報的動機。
Q：
資料如實呈上的話會趕不及第一場？會否覺得成個過程好趕？踩台時間唔夠？
Lokman：
其實「時間」呢樣嘢在香港呢個地方都好緊絀啦，我們成日做好多 show 都覺得，啊如果多一兩日就好，包括全民造星一開頭，都係諗，如果多一日俾我哋排練就好喇。所以…呢個都可以係我哋香港人的精神嚟嘅……所有問題盡量解決佢啦。
Q：
你們正式踩台係幾時?
Lokman：
係（正式演出）兩三日前
Q：
而家睇返得兩三日踩台其實…
Anson Kong：
其實如果按未入行前做 dancer 做 show，踩台都係差唔多，都係兩三日、三四日前，視乎個 show 有幾多機關，有幾大型，可能做郭富城演唱會，多些機關，可能試的時間會多啲？Depend on 每個 show 的監製覺得個 show 有幾多重要的機關然後安排。都係演唱會監製負責的東西。我們控制到的是每次排練專心去做。頭先阿 Man（Lokman）講的，排練時我們多數 focus 在台面的東西。幾日發生的問題，都係台面升降、機關上的問題，所以每日返到去都係 focus on 地面上的問題，睇清楚啲窿，睇清楚啲升降台。
Q：
嚟緊最快開 show 係阿 Lo，會否份外注意安全？
Anson Lo：
當然會啦…今次同任何，無論係表演單位、dancer 朋友，今次會 check 得再…
Lokman：
【代答】溝通會再足啲。
外界另一關注點是 MIRROR 演唱會受傷舞蹈員的受聘形式及勞工保障。勞福局局長孫玉菡昨日表示，經調查及諮詢律政司後，認為相關舞蹈員是以僱員身分參與演出，勞工處會考慮檢控其僱主，即舞蹈公司，及演唱會處所佔用人，包括承辦商及製作公司。他又指舞蹈公司沒為舞蹈員買勞工保險及沒呈報工傷，當局會按法例採取行動。
Q：
Dancers 無買保險，（不清楚）
Lokman：
Dancers 的保險，我諗要睇下之後的報告再出先清楚，因為好多問題我們都不知道
Q：
但你知不知道 dancers 負責人是否 rock sir？
Lokman：
以我所知，應該係。
Q：
Dancers 假自僱的情況是否普遍？以後會否叫公司幫 dancers 買足保險？報告出來，有否說話跟阿 Mo 講？
Anson Kong：
我們有一半人以前都係做 dancers，以前做 show 一定會留意自身呢個問題，我相信今次呢個意外發生後，以後的 show，所有表演者無論 band、artists、dancers 都會注重多些這個問題。
早前《Wave.》就香港舞蹈員處境進行專題報道，一名受訪者指，因很多時候不清楚資方有沒有購買保險，香港 dancer 一般都習慣自己投保，「我們的保費仲會比一般人貴，因為我們算是高危行業。」參考受訪者提供的信息記錄，dancer 一開始通常只會獲告知需要預留哪些日子作排練及演出，間中會提及酬勞等，其他如具體工作內容、保險或賠償等細節，則一律欠奉。「所以其實都好講個信字，咁多年香港的舞台都無發生過嚴重意外，本身我們都有個信任。」
Q：
可否問多一個問題？想問你們這些表演者在台上面好無保障?
Lokman：
好無保障啊？ER…………我覺得……………（五秒）
Alton：
我覺得今次公司喺呢件事上面都好保護我們，保護咁多位表演者。今次呢個報告出咗，係畀公眾了解件事，係好的。我們現在最關注的都是幾位 dancers 的情況。
Anson Kong：
我相信每一個地區對表演者的保護條款都唔同，有些國家多啲，有些國家少些，相信香港現在未在這制度上不是完全最成熟的，希望今次意外發生後，大家真的關注這件事，令到表演者再做任何表演，都可以有更多的保障。
（完）
